محسن محمد يقول اصْبُرْ
يا قلب مشغول بهمومه
يا الله طلبتك وأنا راجي
انصر جمال, دَمِّرْ اخْصُومه
هو قائد الوحده الكبرى
الله ىيطوّل مدى يومه
وبعد ذا الحين طاب الرأس
وتنَبَّهْ النَّيم من نومه
قلبي ذكر ذي نَسَعْ جعده
أسْيَان عالكتف مَرْدُومه
لمَّا متى با يصافحني
في راحة اليد وابْهُومه
ما حِبّ غيره ولا بدِّل
إلاَّ السماء بدَّل انجُومه
فيني كنينه مخبيها
ما بين لضلاع مضمومه
ما اليوم با قولها ظاهر
من حن مثلي فلا لومه
با حِنّ ما حَنّ بن زامل
غنَّى على أوتار مَبْرُومه
كم كابد الحُبّ واتعذَّب
ضحَّى بلحمه مع اعْظُومه
أيضاً ويحيى عمر قبله
وكم عدد ناس مظلومه
الحُبّ أصله من الفتنه
باطل وهَوْمَهْ قفا هَوْمَهْ
لا ذي بقلبي على صنعاء
تصبُح سَلافخ ومحطومه
قد خير بَصْبُرْ وبا خبِّي
وأشجان بالقلب مرزومه
وبعد يا طارش اتْوَكَّلْ
قم وصِّل الخط في يومه
وانشد على الخالدي واسأل
وصفه مع الناس واعْلُومه
وصفه في العز والجوده
ذي حَوَّز العزّ باسهُومه
قل له سلامي فلا يُحصى
من عد ليله مع يومه
واعْطَهْ كتابي وقل يقرأ
نَصْبَهْ وخَفْضَهْ ومضمومه
من دَيَّن الناس يتخلَّص
وذاك يوفي بتسلومه
قبلت خطَّك على رأسي
وقلت حيَّا بتقدومه
أيضا ولا اتخبَّرك قل له
حياة ذا الوقت مذمومه
قل له فلسطين تتوقَّد
مكريبها ما طفي حَوْمَهْ
ناصر حلف قال ما نقبل
دوله لقيطه ومزعومه
ذي لا أساساً لها قطعاً
ماهل من الغرب مدعومه
واجب علينا ندمرها
رَعْهَا عصابات مَرْجُومه
وأخبار من شعب واشنطن
ذي واجه الحرب واهْمُومه
خطّه رسمها لهم (جُونسُون)
أسف على كُثر تعلومه
عصيدته ذي عصد باقي
بالويل والسم معسومه
واليوم قدَّم لها (نِكْسُنْ)
يؤكل من السُّم مقسومه
والاَّ يجي له فلسطيني
يقطع رقبته وحلقومه
مثل الرئيس الذي قبله
خَبْطَهْ على طُول دَرشومه
(جُنْسُون) خسر واختسر شعبه
رَعَهْ تسَايا في العُومه
خسر ملايين واتْمَدَّح
قال إن فيتنام مهزومه
وشعب فيتنام ما يُهزم
والصين بعده وتقدومه
وأنت أسألك وأنت أخبرني
في فصل واضح في اعْلُومه
ما غالطك شي ولا بغلط
قلبك ذعر شك ما لومه
حذّرتني حذر بالتالي
لا تجزع الظل والعومه
تَعْطِيْر مقلوب وابْتِبْعِدْ
شُف عَرْجة الذيب مفهومه
إشارتك غيب يا شائف
قلبي فهم قدر معلومه
عارف من الليم لا العنبا
لا الشهر ذي قلت لي صُومه
ما ليم قد حازه الحائط
وأقفال عالباب مبهومه
عليه حُرَّاس ومَدَافع
وأمشاط رشاش مسمومه
وأذكر نبي ما القلم نقَّطْ
حروف باللوح مرقومه
